Llan de Cubel ye un grupu asturianu de música folk, que trabaya sola tradición músical asturiana, dándo-y un soníu nueu.
Pa ello recurre principalmente al material recoyío nos archivos de los grupos asturianos d'investigación etnográfica y a los cancioneros tradicionales; esto compleméntase cola recuperación polos miembros del grupu de temes tradicionales direutamente de la xente asturiano, ensin escaecer los temes más populares del país.
La formación de los componentes del grupu básase en dos aspeutos fundamentales: per un llau, son músicos tradicionales, conocedores ya intérpretes habituales de los istrumentos más carauterísticos d'Asturies; per otru llau, el so interés por otres tradiciones de la Europa Atlántica enriqueciera los conocimientos musicales del grupu, especialmente nos aspeutos téunicos y armónicos.
El soníu de Llan de Cubel ye acústicu. El pesu la melodía y la percusión llévenlo los istrumentos tradicionales asturianos (gaita, vigulín, flauta travesera de maera, tambor y panderos), mentes que la armonía apúrrenla la guitarra acústica y el bouzouki (que tamién contribuyen a la sólida base rítmica, tan carauterística del grupu). Namái se recurre a istrumentos elléutricos (pedalera de baxos y teclaos) como sofitu en pasaxes muy concretos de dellos temes. Anque la llínia ye básicamente istrumental, el grupu tamién trabaya l'aspeutu vocal aprovechando la llarga y rica tradición nesta fastera de la música tradicional astur.
El repertoriu del grupu provien, en gran midía, de la tradición asturiana de vigulín, flauta, acurdión y, sobre too, de gaita: alboraes, marches y pasucáis, bailles (como saltones, muñeres, polques, …), música relixosa (misa de gaita, entemeiu misa), etc. Otres fontes habituales incluyen dancies y canción tradicional asturiana: tonada, vaqueiradas, villancicos, cantares (de la marina, de trabayu, de chigre,…). En cuanto a los temes cantaos, ainda incluyendo delles lletres tradicionales, Llan de Cubel suel emplegar testos de autor, normalmente contemporáneos, siempre musicaos con melodíes tradicionales asturianes.
Dende los sos anicios en 1984, Llan de Cubel participó activamente nel procesu revitalización de la cultura tradicional asturiana, contribuyendo igualmente a la divulgación de la mesma, sobre too no que a música y llingua se refier. El so llabor como grupu pioneru del folk asturianu ta reconocío na importante obra "Hestoria d'Asturies", nel apartáu dedicao a la hestoria de la música asturiana. Anguañu ye la formación más consolidada dientru'l movimientu folk autóctonu, siendo referencia importante pa les nueves xeneraciones.
