Llan de Cubel naz nel branu de 1984, como resultao de la xuntura de dos núcleos de músicos: ún d'Uviéu, formao por Elías García y Fonsu Mielgo, pareya tradicional de gaita y tambor a la que se xoncen el guitarrista Susi Bello y el percusionista Daniel Lombas, y otru en Cuideiru, constituyíu pol vigulinista Guzmán Marqués y el flautista Marcos Llope.
Dempués de coincidir nun festival, deciden trabayar conxuntamente na fechura d'un grupu de folk asturianu, al que bauticen col nome d'un monte del conceyu pixuetu de Cuideiru: Llan de Cubel. Facemos equí alcordanza de que, nesi momentu, n'Asturies namái funcionaben dos grupos de folk estables (los dos esaniciaos cuantayá).
Tres un curtiu periodu de rodax, el grupu plantégase un trabayu más costante y profesional, animao por la bona acoyía que tien la so presentación pública, n'avientu de 1984, nel II Certame d'Arpa Céltica d'Uviéu.
De la xente qu'entamó col grupu queden güei Elías García, Fonsu Mielgo y Marcos Llope, a los que se yos xunieron Xel Pereda, Simon Bradley y Xuan Rodríguez nos años 1995, 1996 y 1997 respeutivamente. Tamién pasaron pel grupu el gaiteru Flavio Rodríguez y el guitarrista J.M.Cano y collaboraren en direutu delles vegaes los gaiteros H.Urquhart y X.N.Expósito.
